ਖੱਟਿਆ ਵੈਰ ਮੰਗੀ ਨਾ ਖੈਰ p4

                                          ਖੱਟਿਆ ਵੈਰ ਮੰਗੀ ਨਾ ਖੈਰ

ਯਾਰੀ ਨਾ ਲਈ ਕਿਤੇ ਖੱਟਿਆ ਸੱਭ ਨਾਲ ਵੈਰ 

ਭਲਾ  ਨਾ ਮੰਗਿਆ  ਨਾ ਮੰਗੀ ਕਿਸੇ ਦੀ  ਖੈਰ 

ਪਿਆਰ ਨਾਲ ਬਣਾਇਆ ਨਾ ਕੋਈ ਆਪਣਾ ਸਭ ਤੇਰੇ ਲਈ ਗੈਰ 

ਕੌੜੇ ਬੋਲ ਬੋਲੇ ਸਭ ਨੂੰ ਜੀਭ ਨਾਲ ਉਗਲੀ ਜ਼ਹਿਰ 

ਕਿਰਤ ਕਮਾਈ ਕੁੱਛ ਨਾ ਕੀਤੀ ਜੋ ਪਾਇਆ ਸੱਭ ਹਰਾਮ  

ਨੀਤ ਮਾੜੀ ਵੰਡ ਨਾ ਛੱਕਿਆ ਖੋਹ ਕੇ ਖਾਦਾ ਆਮ 

ਭੁੱਲਿਆ ਤੂੰ ਕਰਤਾਰ ਨੂੰ ਜੱਸਿਆ ਜਪਿਆ ਨਾ ਉਸ ਦਾ ਨਾਮ

ਕਾਮ ਕਰੋਧ ਲੋਭ ਤੇਰੇ ਅੰਦਰ ਭਰਿਆ ਬੰਦਾ ਨਹੀਂ ਤੂੰ ਹੈਵਾਨ 

ਰਸਤਾ ਜੋ ਚੱਲਣ ਲਈ ਚੁਣੇ ਸਿੱਧੇ ਉਹ ਨਰਕ   ਨੂੰ ਜਾਣ 

ਦੇਰ ਅਜੇ ਵੀ ਨਹੀਂ ਹੋਈ ਹੁਣ ਵੱਕਤ ਸਂਭਾਲ 

ਸ਼ੁੱਧ  ਕਰ  ਸੋਚਣੀ ਅਪਣੀ ਚਿੱਤ ਲਾ ਉਸ ਦੇ ਨਾਲ

ਉਹ ਨਿਰਵੈਰ ਬਖਸ਼ੰਦ ਬਖਸ਼ੂ ਰੱਖ ਉਸ ਤੇ ਆਸ 

ਸੱਚੇ ਦਿਲੋਂ ਦੇ ਪੁਕਾਰ ਉਸ ਨੂੰ ਕਰ ਜੋੜ ਕਰ ਅਰਦਾਸ

ਇੰਝ ਰਹੇ ਬੱਚੀ ਜੋ ਹੋਰ p4

ਇੰਝ ਰਹੇ ਬਚੀ ਜੋਂ ਹੋਰ ਜਿੰਦ ਵਿੱਚ ਕਈ ਪਾਪੜ ਬੇਲੇ l ਵਨ ਸਵਨੇ ਖੇਲ ਵੀ ਅਸੀਂ ਖੇਲੇ! ਨੇਰੀ ਝੱਖੜ੍ਹ ਤੂਫ਼ਾਨ ਵੀ ਝੇਲੇ ! ਉਦਾਸ ਬਹੇ ਕੀਤੇ ਵੀ ਮੇਲੇ ! ਕਈ ਵਾਰ ਬਾਜੀ ਮਾਰੀ ! ਕਈ ਥਾਂ ਵਾਰੀ ਹਾਰੀ ! ਊਟ ਪਟਾਂਗ ਬੋਲ ਵੀ ਬੋਲੇ ! ਝੂਠ ਬੋਲੇ ਘੋਲ ਵੀ ਘੋਲੇ ! ਕਬਾਬ ਖਾਦੇ ਸ਼ਰਾਬ ਵੀ ਪੀਤੀl ਸ਼ਰਮ ਛੱਡ ਐਸ਼ ਵੀ ਕੀਤੀ l ਧੰਨ ਜੋੜਿਆ ਪੈਸੇ ਵੀ ਉੜਾਇਆl ਬਦਨਾਮ ਹੋਏ ਨਾਂ ਵੀ ਕਮਾਇਆ ! ਦੁਸ਼ਮਣ ਬਣਾਏ ਯਾਰੀ ਵੀ ਲਾਈ ! ਪਿਆਰ ਕੀਤਾ ਤੋੜ ਵੀ ਨਿਭਾਈ ! ਰਜ ਕੇ ਜੀਣ ਦੀ ਰਹੀ ਖੁਮਾਰੀ! ਅਪਣੀ ਜੂਨ ਸਾਨੂੰ ਲੱਗੇ ਪਿਆਰੀ! ਸੋਹਣੀ ਰਹੀ ਜਿੰਦ ਨਾ ਕੋਈ ਅਫਸੋਸ! ਲੋਚਾਂ ਇੰਝ ਰਹੇ ਬਚੀ ਹੈ ਜੋ ਹੋਰ !

ਆਊ ਮੇਰੀ ਵਾਰੀ p4

ਆਊ ਮੇਰੀ ਵਾਰੀ ਲਾਲੋ ਲਾਲ ਮੈਂ ਹੋਇਆ ਲਾਲ ਨੂੰ ਲੱਭਣ ਲਈ! ਲਾਲ ਨਾ ਲਭਿਆ ਕਿਤੇ ਉਮਰ ਗੁਜ਼ਰ ਗਈ! ਲਾਲ ਭਾਲਿਆ ਮੰਦਿਰ ਅੰਦਰ ਲਾਲ ਭਾਲਿਆ ਦਵਾਰੇ ! ਲਾਲ ਭਾਲਿਆ ਗਿਰਜੇ ਮਸਜਿਦ ਭਾਲਿਆ ਪਾਕ ਥਾਂ ਸਾਰੇ! ਅਠਸਠ ਤੀਰਥ ਪੈਦਲ ਗਾਹੇ ! ਪਵਿੱਤਰ ਸਰੋਵਰ ਸਾਰੇ ਨਾਹੇ ! ਗ੍ਰੰਥ ਪੜ੍ਹੇ ਟੋਲ੍ਹ ਨਾ ਪਾਇਆ ! ਸੰਤਾ ਸਮਝਾਇਆ ਸਮਝ ਨਾ ਆਇਆ! ਸੱਚੇ ਬਾਰੇ ਸੱਚ ਗੁਰਾਂ ਫਰਮਾਇਆ! ਦਸਿਆ ਸੱਚੇ ਨੂੰ ਸਰਬਸਮਾਇਆ ! ਮੂਰਖ ਇਸ ਸੱਚ ਨੂੰ ਮਨੇ ਨਾ ਬੈਠਾਇਆ ! ਇਸ ਬਾਰ ਮਿਲਣ ਨਾ ਲਿਖਿਆ ਸੰਜੋਗ ਮੇਰੇ ! ਲੌਣੇ ਪੈਣੇ ਚੌਰਾਸੀ ਦੇ ਕਈ ਹੋਰ ਗੇੜੇ ! ਲਾਲ ਨੂੰ ਲੱਭਣ ਦੀ ਚਾਹ ਰੱਖਣੀ ਜਾਰੀ! ਕਦੀ ਤਾਂ ਪਊ ਨਦਰ ਆਊ ਮੇਰੀ ਵਾਰੀ ! xxxx

ਸੋਹਣਾ ਆਇਆ ਵਿਚਾਰ p4

       ਸੋਹਣਾ ਆਇਆ ਵਿਚਾਰ

ਵੋਹਲੇ ਬੈਠਿਆਂ ਬੀਤੀ ਜਿੰਦ ਬਾਰੇ ਕੀਤਾ  ਵਿਚਾਰ

ਕਿੱਥੇ ਕਿੱਥੇ ਮੈਂ ਜਿੱਤ ਪਾਈ ਕਿੱਥੋਂ ਗਿਆ ਮੈਂ ਹਾਰ

ਕਿਹੜੇ ਮਸਲੇ ਪੱਲਾ ਮੇਰਾ ਭਾਰਾ ਕਿੱਥੇ ਖਾਈ ਮਾਰ

ਕਿਵੇਂ ਕਿਵੇਂ ਕਿਸੇ ਉੱਲੂ ਬਣਾਇਆ ਕਿੱਥੇ ਮੈਂ ਨਿਕਲਿਆ ਹੁਸ਼ਿਆਰ

ਕਿੰਨੇ ਕਿੰਨੇ ਰਿਸ਼ਤੇ ਜੋੜੇ ਕਿੰਨੇ  ਨਾਤੇ ਤੋੜੇ ਕਿੰਨਾ ਕੀਤਾ ਪਿਆਰ

ਕਿੰਨਿਆਂ ਨਾਲ ਦੁਸ਼ਮਨੀ ਖੱਟੀ ਕਿੰਨੇ ਬਣਾਏ ਯਾਰ

ਦੁਨਿਆਂਦਾਰੀ ਦੇ ਲਿਹਾਜੋਂ ਪਰਖਾਂ ਮੈਂ ਪੂਰਾ ਨਾ ਆ ਪਾਇਆ

ਘਾਲ ਕੋਈ ਦਿਲ ਲਾ ਨਾ ਕੀਤੀ ਕੱਠੀ ਨਾ ਹੋਈ ਸਰਮਾਇਆ

ਵੱਡੀ ਕੋਈ ਤੋਪ ਨਾ ਮਾਰੀ ਨਾਮ ਨਾ ਕੋਈ ਕਮਾਇਆ 

ਭਰਮ ਭੁੱਲੇਖੇ ਘੁਮਦਾ ਰਿਆ ਸੱਚੇ ਦਾ ਨਾਂ ਨਾ ਧਿਆਇਆ

ਫਿਰ ਸੋਚਿਆ ਪੈਸੇ ਵੱਲੋਂ ਮੈਂ ਚਾਹੇ ਨਹੀਂ ਅਮੀਰ

ਸੋਹਣਾ ਬੁੱਤਾ ਸਾਰਦਾ ਰਿਹਾ ਰੱਬ ਮੈਂ ਨਾ ਕੋਈ ਗਰੀਬ

ਜ਼ਿੰਦਗੀ ਦੇ ਭਰਭੂਰ ਖ਼ਜ਼ਾਨੇ ਮੇਰੇ ਜਿਗਰੀ ਯਾਰ

ਖ਼ੁਸ਼ਹਾਲ ਵੱਸੇ ਟੱਬਰ ਮੇਰਾ ਆਪਣਿਆਂ ਦਾ ਮਿਲਿਆ ਪਿਆਰ

ਸੋਹਣੀ ਮੇਰੀ ਜ਼ਿੰਦਗੀ ਬੀਤੀ ਵੇਹਲੇ ਬੈਠਿਆਂ ਸੋਹਣਾ ਆਇਆ ਵਿਚਾਰ

ਲਛੱਣ ਨਹੀਂ ਚੰਗੇ p4

           ਲਛੱਣ ਨਹੀਂ ਚੰਗੇ

ਲਛੱਣ ਬੰਦੇ ਨਹੀਂ ਤੇਰੇ ਚੰਗੇ

ਚੰਗੇ ਨਹੀਂ ਲਛੱਣ ਤੇਰੇ ਬੰਦੇ

ਧੰਨ ਦਾ ਲਾਲਚ ਤੇਰੀ ਨੀਤੇ ਸਮਾਇਆ 

ਮਾਰੇਂ ਠੱਗਾ ਠੋਰੀ ਕੱਠੀ ਕਰੇਂ ਸਰਮਾਇਆ

ਧੋਖਾ ਦੇਂਵੇਂ ਕਰੇਂ ਗੋਰਖ਼ ਧੰਦੇ

ਲਛੱਣ ਬੰਦੇ ਨਹੀਂ ਤੇਰੇ ਚੰਗੇ

ਚੰਗੇ ਨਹੀਂ ਲਛੱਣ ਤੇਰੇ ਬੰਦੇ

ਹੁਸ਼ਿਆਰੀਆਂ ਕਰ ਛੂਪਾਂਏਂ ਆਪਣੇ ਕਾਰਨਾਮੇ

ਪਤਾ ਨਹੀਂ ਲੱਗਣਾ ਜੱਗ ਕੀ ਜਾਂਣੇ

ਨਾਤੇ ਗੁੱਝੇ ਨਹੀਂ ਰਹਿਣੇ ਇੱਕ ਦਿਨ ਹੋਣੇ ਨੰਗੇ

ਲਛੱਣ ਬੰਦੇ ਨਹੀਂ ਤੇਰੇ ਚੰਗੇ

ਚੰਗੇ  ਨਹੀਂ ਲਛੱਣ ਤੇਰੇ ਬੰਦੇ

ਸੋਹਣੀ ਸੂਰਤ ਤੇ ਮਰ ਮਰ ਜਾਂਏਂ

ਦਿਮਾਗ਼ ਲੜਾਏਂ ਕਿਵੇਂ ਉਸੇ ਫ਼ਸਾਂਏ

ਪਾਪ ਕਰਨ ਤੋਂ ਭੋਰਾ ਨਾ ਸੰਗੇਂ

ਲਛੱਣ ਬੰਦੇ ਨਹੀਂ ਤੇਰੇ ਚੰਗੇ

ਚੰਗੇ ਨਹੀਂ ਲਛੱਣ ਤੇਰੇ ਬੰਦੇ

ਸੁਆਰਥੀ ਤੂੰ ਦੂਸਰੇ ਲਈ ਤੈਨੂੰ ਪਿਆਰ ਨਾ ਆਈਆ

ਕਰਨਵੀਰ ਆਪ ਸਮਝ ਕਰਤਾਰ ਨੂੰ ਭੁੱਲਾਇਆ

ਚਿੱਤੇ ਮੈਲ ਮੱਥਾ ਟੇਕ ਪੈਸਾ ਚੜ੍ਹਾ ਖ਼ੈਰ ਤੂੰ ਮੰਗੇਂ

ਲਛੱਣ ਬੰਦੇ ਨਹੀਂ ਤੇਰੇ ਚੰਗੇ

ਚੰਗੇ ਨਹੀਂ ਲਛੱਣ ਤੇਰੇ ਬੰਦੇ

ਵਕਤ ਹੈ ਵੇਖ ਖੁੰਝ ਨਾ ਜਾਏ

ਭੁੱਲਾ ਨਹੀਂ ਜੋ ਸ਼ਾਮਾਂ ਘਰ ਆਵੇ

ਸ਼ੁਧ ਮਨੇ ਸਾਂਈਂ ਨੂੰ ਜਾਣ ਆਪਣੇ ਸੰਘੇ

ਲੱਛਣ ਬੰਦੇ ਹੋਣਗੇ ਤੇਰੇ ਫ਼ਿਰ ਚੰਗੇ 

ਚੰਗੇ ਹੋਣਗੇ ਫ਼ਿਰ ਲਛੱਣ ਤੇਰੇ ਬੰਦੇ 

ਅੰਦਰ ਝਾਤੀ ਮਾਰ p4

            ਅੰਦਰ ਝਾਤੀ ਮਾਰ

ਰੱਬ ਨੂੰ ਭਾਲਦੇ ਜਸਿਆ ਤੂੰ ਛਾਣੀ ਦੁਨੀਆਂ ਸਾਰੀ 

ਕਿਤੇ ਨਾ ਮਿਲਿਆ ਤੈਨੂੰ ਆਪਣੇ ਅੰਦਰ ਨਾ ਝਾਤੀ ਮਾਰੀ

ਗ੍ਰੰਥ ਪੜੇ ਗਿਆਨ ਕੀਤਾ ਖਾਸਾ ਕੱਠਾ 

ਫਿਰ ਵੀ ਰੋਸ਼ਣ ਨਾ ਹੋਇਆ ਨਹੀਂ ਡਿੱਠਾ 

ਸੰਤਾਂ ਦੇ ਡੇਰਿਆਂ ਸੀਸ ਨਿਵਾਇਆ

ਸਰਬਸਮਾਏ ਨੂੰ ਵੇਖ ਨਾ ਪਾਇਆ 

ਦਾਨ ਕੀਤੇ ਪਾਠ ਵੀ ਕਰਾਏ

ਦਵਾਰ ਸਮਝ ਪੈਸੇ  ਵੀ ਚੜਾਏ

ਭੁੱਖ ਲਾਈ ਮਨ ਦੀ ਚੈਨ ਗਵਾਈ

ਅਵੱਲੀ ਖੁਮਾਰੀ ਜਿੰਦ ਨੂੰ ਲਾਈ

ਮਿਲਣ ਨਹੀਂ ਸੀ ਮੱਥੇ ਲਿਖਾਈ  

ਸ਼ੁਧ ਨਹੀਂ ਤੇਰਾ ਹਿਰਦਾ ਲੱਭਣਾ ਨਹੀਂ ਸੱਚੇ ਦਾ ਰਾਹ

ਸਵੱਲੀ ਨਹੀਂ ਹੋਣੀ ਨਦਰ ਭੁੱਲੇਖਾ ਨਾ ਖਾ

ਬਾਹਰ ਨਹੀਂ ਉਹ ਆਪਣੇ ਅੰਦਰ ਝਾਤੀ ਮਾਰ 

ਅੰਦਰਲੇ ਨੂੰ ਪਿਆਰ ਤੂੰ ਕਰ ਬਣਾ ਆਪ ਨੂੰ ਆਪਣਾ ਯਾਰ

ਛਾਨਣੀ ਨਹੀਂ ਪਊ ਦੁਨਿਆਂ ਜਸਿਆ ਮਿਲੂ ਜੂਨ ਦਾ ਸਾਰ